Изарня – сорта кече.Вес тӱняшке кайыше-влакын Кугечышт. Ты кечын еш дене чумырген, шке колышо родо-тукымым уштен кычкырат. Эрдене эрак (але вӱргечын кастене) мончаш пурат: ондак пӧръеҥ-влак, вара – ӱдырамаш-влак. Пеленышт тоштыеҥ-влакым ӱжыт, мушкылт толын, ару вургемым чият. Лӱмын ямдылыме теҥгылыш але ӱстембак мелнам, перемечым, когыльым, муным, пурам, чыве шылшӱрым, пучымышым шындат. Тушанак шыште сортам чӱктат, «шужо» манын тоштыеҥлан пелештат, сай илышым, киндыперкем, тазалыкым, аралтышым йодыт.   Кечывал деч вара тоштыеҥ-влакым ужатат.

Кугарня– ош тӱняште улшо-влакын Кугечышт.Ты кечын эрдене, кече лекме деч ончыч, шӱрашан когыльым кӱэштыт, муным чиялтат. Эрдене кече лекмым эскерат. Кече модын кӱза гын, илыш куштылго лиеш. Эрдене ояр гын, шурно умен шочеш, мӱй чот лиеш. Йӱран гын, идалык понгылан поян лиеш, кӱдырчӧ кӱдырта гын, кеҥеж шокшо лиеш. Самырык- влак уремыште тӱрлӧ модыш дене модыт, пайрем лӱмеш сакыме лӱҥталтыш дене лӱҥталтат.

Шуматкече – Кугече шуматкече. Кугу сомылым огыт ыште, пайрем умбакыже шуйна. Родо-тукым да пошкудо-влак деке коштыт.

Рушарня– Руш вераш куснышо марий-влакын Кугечышт. Сортам чӱктат, юмым пелештат. Чиялтыме муным, мелнам, перемечым кочкыт.  

Шочмо – юмо кӱзымо кече.Ташлама йӱмаш дене мучашлалтеш.

Южо кундемысе марий-влак Кугече кече деч вара эше ик арня пайремым кучат.Ты жап Изи Кугече маналтеш.

Пайрем дене!