25 июньышто Йошкар-Олаште «Пеледыш пайрем» эрта. Йÿла почеш, пайрем Тумер отышто Агавайрем кумалтыш гыч тÿҥалеш, а кастене, Ленин площадьыште, марий дискотеке дене мучашлалтеш.

«Пеледыш пайремыште» «Марий кудо», «Йоча вургем», «Марий ÿдыр», «Эх кувавай!» да «Онарын тукымжо» конкурс-влак эртат.

Республикына да моло регионла гыч марий фольклор коллектив-влак шке мастарлыкыштым ончыктат. Тыгак уна-влакым «Йыр куштымаш» да «Марий кас» вуча. «Саскавий» ÿдырамаш ушем «Марий солык» конкурсым эртара.

Организатор-влак: Марий Эл Республикын тÿвыра, печать да калык-влакын пашашт шотышто министерстве, Марий Эл Республикысе ялозанлык министерстве, Республикысе марий тÿвыра рÿдер да «Мер каҥаш».