Ион Александрович шотан, яндар шӱм-чонан, калыкын кумылжым савырен моштышо лийын. Чылаштым туныктен, кӱлеш годым мокталтен, шылтален кертын. Ятыр уста механизаторым, вольык ончышым кугыжаныш награде дене чапландараш йӧным ыштен. Отышто кумалме годым, чыланат кугу ўшан дене Ион Александрович деч илышыште аралтышым йодыныт.
Пашам сайын виктарен колтымыжлан «Знак Почета» орденым, «За трудовую доблесть», «За преобразование Нечерноземья РСФСР» медаль-влак дене суапландаралтын. Тудо Марий АССР ял озанлыкын сулло пашаеҥже.

Пелашыж дене пырля ныл эргым да кок ӱдырым ончен куштеныт.

Марий Эл Республикын рӱдӧ юмыйӱла ушемже да Республикысе марий тӱвыра рӱдер, ятыр ий марий йӱла пашам вораҥдарен шогышо, тале марий онаеҥ Ион Александрович Свечниковын ош тӱня дене чеверласымыжлан еш да родо-тукымжылан чаманымашым каласа. Кийме мландет пушкыдо лийже…