16-30 июньышто мемнан Республикыште «Марий Эл – кугезе мланде: йӱла да тачысе пагыт» Россий кӱкшытан пленэр эртаралтеш. Яндар кава йымалне сӱретлашлан верым У Торъял районышто палемдыме.
Российын тӱрлӧ кундемлаже гыч 15 сӱретче-влак марий калыкын йӱла пайремжым сӱретлаш тӱҥалыт. Марий Эл гыч Иван Ямбердов, Измаил Ефимов да Сергей Алдушкин лийыт.
19 июньышто сӱретче-влак Чумбылат курыкышто эртаралтше кумалтышке мият гын, 20 июньышто – Овалже ялын Агавайремыштыже сӱретлаш тӱҥалыт. 27 июньышто У Торъял тӱвыра полатыште сӱрет ончерым ужаш лиеш. 29 июньышто у сӱрет-влак Республикысе сӱретсымыктыш тоштерын фондышкыжо колталтыт.
