17 июньышто Финляндийысе Лахти олаште финн-угор калыкын VII Тӱнямбал конгрессше шке пашажым иктешлен. Финн-угор калыкын консультативный комитетын у вуйлатышыжлан карел калык Ушем деч Татьяна Клееровам сайлыме. Вес финн-угор калыкын Тӱнямбал конгрессше Эстонийысе Тарту олаште 2020-шо ийыште лиеш.
Марий калык деч тематический заседанийыште культурологий доктор, профессор Галина Шкалина витньыкым (докладым) ыштен. «Илыше библиотекыште» 13 финн-угор калык коклаште «Пувий» мер ушемым вуйлатыше Виталий Кудрявцев марий мут-влакым йоҥгалтарен. СМИ дене кылым кучымо пашам журналист Эльвира Куклина да Денис Речкин шуктен шогеныт.
