Шыже – телылан шапашым ыштыме жап. Тидым ышташ тыланда, олаште да лишыл районлаште илыше-влаклан, «Саска» пайрем полша. Тушто ялозанлык предприятий ден организаций, фермер, шке озанлыкым кучышо-влакын кочкыш йӧрварыштым налаш лиеш. Кешыр, ковышта, пареҥге, шыл, кол, колбаса йӧрвар, мӱй да мӱй йӧрвар – чылажат келшыше ак дене ужалалташ тӱҥалеш.

«Саска» пайремлан муро кумылан ямым Республикысе тӱвыра рӱдер пеленсе «Чон оҥыр»фольклор да «Юкече» йоча ансамбль-влак пуртат, посна мурызо-влакын выступленийыштым ончаш йӧн лиеш. Толза, марий сем почеш каналтыза, кужу телыда куштылгын эртыже манын, кочкыш йӧрвар шапашым ышташ вашкыза. Алал кумылын вучена.