В.Ф. Евдокимов профессийже дене апшат, Алтай областьысе М.А.Калинин лӱмеш трактор заводышто апшат-штамповшиклан тыршен, апшат-влакын бригадирже, цехысе комсомол организаций вуйлатыше семын пашаште пеҥгыдылык да йолташым умылен моштымыжо дене ойыртемалтын. Кызыт 74 ияш, сулен налме канышыште, Рубцовск олаште 55 ий ешыже дене ила, тиде олан почетан гражданинже. Тиде ола тудлан кокымшо шочмо кундемыш савырнен, шке манмыжла, ик гана кум ийлан тудым коден каен, Совет армийыште служитлыме жаплан. 30 ий ончыч, 1986 ий июньышто 11 вичияшын планжым кум ият пеле жапыште шуктымыжлан СССР-ын Социлистический Пашан Геройжо лӱмым пуымо. Виктор Федорович Октябрь революций, кок гана Ленин лӱмеш орден-влак, «Серп и молот» шӧртньӧ медаль дене палемдалтын. Пашаште кугу лектышыш шумыжлан 1982 ийыште СССР-ын Кугыжаныш премийын лауреатше лӱмым сулен налын.
