«Наши семейные ценности» — тыге маналтеш Республикысе марий тӱвыра рӱдерын Йошкар-Оласе туныктыш управлений дене пырля увертарыме конкурсшо. Тушко марий рӱдолаште илыше тӱрлӧ калык гыч лекше самырык еш-влак ушнен кертыт.

Тидлан шуко огеш кӱл: эн ончыч кумыл лийшаш, еш дене пырля пайремым эртарыме, каныме нерген видеом возыман. Тидын годым тӱрлӧ жанрым кучылташ лиеш, съемкым але монтажым ыштыме годым еш дене пырля войзалтме фотографий-влак дене пайдаланаш лиеш. Видеофильм качество велым ойыртемалтше лийже манын, 720х1080 разрешений деч изи огыл лийшаш. Видеофильм 3 минут наре шуйнышаш, икымше кадр автор да тудын ешыж нерген ойлышаш.

Ешдан илыш йӱлаже дене палдараш кумылда уло гын, рӱдолаште илыше самырык еш-влак, пашадам 1 ноябрь марте тыгай электрон адрес дене колтыза: mari-centr@mail.ru.