Тиде площадкыште тӱҥ шотышто мер ушемын енже, Поволжский кугыжаныш технический университетын студентше ден преподавательже, газет редакций пашаеҥ-влак лийыныт. Диктант тӱҥалме деч ончыч Марий Эл Республик тӱвыра, печать да калык-влакын пашашт шотышто министрын алмаштышыже Г.Ширяева, туныктымо да шанче министерствын специалистше С.Свечников акцийыш ушнышо-влаклан сай лектышым тыланеныт. Россий нерген ончыктымо видеофильмыште тест-диктантыш пуртымо куштылго огыл ик йодышлан вашмут йоҥгалтын. Шукынжо, мутат уке, тыгай «шпаргалке» дене пайдаланеныт.

 — Тыгай акцийыш ушнымаш шӱм-чоным да уш-акылым пойдара, — палемдыш рӱдерын пӧлка вуйлатышыже Л.И.Кошкина. – Тудо чыла сферыште тыршыше-влаклан пайдале, эн чотшо, ончычшо туныктышо семын палемден кодем, тыгай акций самырык тукымым воспитатлымаште сай кышам кода, шочмо элым, шке кундемым пагален илаш ӱжеш, тӱрлӧ национальностян калык-влаклан шке шамыштым нӧлталаш полша.

Марий Элыште «Кугу этнографий диктант» акцийыш, Марий Эл Республик тӱвыра, печать да калык-влакын пашашт шотышто министерствын пресс-службыжын увертарымыж почеш, 8 площадкыште 564 еҥ ушнен. Россий кӱкшытыштӧ иктешлымаш 4 ноябрьыште лиеш.