Фестивальын тӱҥ цельже – Марий Элыште илыше калык-влак коклаште келшымаш кылым вияҥдаш, калык-влакын тӱвыраштым да йӱлаштым аралаш да вияҥдаш, калык-влакын тӱвыраштым Российын ик кугу поянлыкше семын умылтарыме шӱлышеш самырык тукымым шуараш.

Фестивальым эртарыме жапыште Марий Эл Республикысе самырык-влак виктерын заседанийже лиеш. Тыгак видеоинсталляций республикысе конкурсым, «Шуко калыкан Йошкар-Ола» квест-модмашым эртараш палемдыме. Икымше курсышто тунемше-влаклан эртарыме художественный самодеятельность дене конкурс-фестиваль тыгак оҥай лийшаш. Йотэл гыч толшо студент-влак дене вашлиймаш эртаралтеш. Мастар классыште тӱрлӧ калыкын ыштыш-кучышыжлан тунемаш лиеш. Республикысе марий тӱвыра, руш тӱвыра да татар тӱвыра рӱдер-влак фестиваль годым шке калыкыштын тӱвыражым да йӱлажым почын пуышо ончерым почыт, тыгак мастар классым эртарат. 2 ноябрьыште Республикысе кум калыкле рӱдер «Икоян ешыште» келшымаш касыш ӱжыт. Тудо Икоян улмо кече да Марий республикын 96-шо шочмо кечыжлан пӧлеклалтеш. Концерт сынан кас Республикысе татар тӱвыра рӱдерыште эрташ тӱҥалеш.