Семинарым марий тӱвыра рӱдерын директоржо Н.В.Пушкина почын да сай паша лектышым тыланен. Министерствын калык да конфессий-влак кокласе кыл пӧлкам вуйлатыше И.Г.Садовин калык-влак коклаште вашкылым вияҥдымаште этнокультурын верже нерген каласкален. Марий Эл Республикын калык артистше, марий тӱвыра рӱдерын режиссер-постановщикше С.В.Строганова эртарыме мастар классыштыже тӱвыра пашаште сценысе сымыктышын кӱлешлыкше да тудлан туныктымо икмыняр йӧн дене палдарен.«Тӱвыра пашаеҥын персональный менеджментше» — тыгай темылан тренингым философий шанче кандидат, МарГУ-н туныктышыжо  Л.Г.Смирнова эртарен. Марий Эл Республикысе писатель-влак Ушемым вуйлатыше С.Д. Архипова пытартыш ийласе сылнымут книга-влак дене палдарен.

Мо тугай йӱк терапий? Кузе йӱкым лукташ? Тидлан марий тӱвыра рӱдер пеленсе «Юкече» йоча коллективым вуйлатыше С.А.Яндукова семинарын участникше-влакым туныктен. Марий кугыжаныш университетын туныктышыжо, туныктыш шанче кандидат В.В.Константинова пашаште лекше конфликтым кузе лыпландараш да тушеч кузе чын лекташ, лекций-тренинг гоч почын пуэн.

Варажым семинарын участникше-влак калык-прикладной сымыктыш тоштерыште Марий АССР сымыктышын сулло деятельже И.М.Пландинын сӱрет, Е.Копылован «Линия души» курчак, С.Романован «Веселые ленточки» лента гыч тӱрлымӧ паша ончерыштым кугешнен онченыт. Мӧҥгышкышт нуно чапле пӧлек дене каеныт. Тудыжым шкеак ыштеныт, тидлан скрапбукинг техникым кучылтыныт. Тиде кидпашалан нуным акак-шӱжарак Бородовамыт туныктеныт.