7 январьыште Шорыкйол пайрем ӱмашсе семынак Марий Купто ялыште эртен. Рӱдерын пашаеҥже-влакымат, ялысе калыкымат йӱштӧ игечат лӱдыктен огыл, марий кечышот почеш у идалыкын шочмыжым веселан палемденыт. 14 суртышто Васлий кугыза ден Васлий кувам, Салтакым, гармоньчо-мӧчӧрым, тӱмырзӧ-мӧчӧрым кинде-шинчал дене вашлийыныт. Ӱстелышт чеслан поян лийын: пакчаште ончен куштымыжат, шыл-торык гыч ямдылымыжат оза ден озаватын идалык мучко ешын ончыклыкшо верч тыршымышт нерген ойленыт. Тиде ялысе калык пашалан кожмак, пеҥгыде сурт-печым кучен ила, вольыклан да сурткайыклан поян. Тыгай суртын озажым да кидпашалан мастар озаватыжым Васлий кува ден кугыза мокталтеныт, а йолагайжым шылтален налыныт. Сугыньыштат нунын моткоч поро лийын, тыгодымак ялысе-влак мыскара кумылан йодышымат пайрем оза-влаклан пуэныт.

Марий тӱвыра рӱдер Марий Китня ялышкат Шорыкйол пайремым конден. У идалыкым калык йӱлам шуктымо да муро-куштымаш, весела марий модыш дене тӱҥалын. Кастене рӱдерын пашаеҥже кок ялыштыжат концертым ончыктеныт. Ончаш толшо калыкым Наталья Пушкина, Геннадий Григорьев, Галина Ласточкина, Александр Мамаев, Эльвира Петрова куандареныт. Умбакшат Республикысе марий тӱвыра рӱдер Марий Турек кундемыште тӱҥ марий пайремым эртараш палемден. Шорыкйол пайремым поро кумылын да тӱшка вий дене эртарен колтымаште Марий Купто ялысе тӱвыра пӧртым вуйлатыше Галина Тихонова кугу полышым пуэн, тудлан пеш кугу тау.

Тидымат палемдыман, рӱдерын пашаеҥже-влак У ий каныш годым марий рӱдолаш экскурсий дене толшо-влакым марий тӱвыра, йӱла да Шорыкйол дене палымым ыштеныт. 2 январьыште пошкудо Виче кундем гыч делегаций Йошкар-Олан моторлыкшым аклен, Чарла Кремльыште нунылан марий йӱлан ойыртемже нерген каласкалыме, пырля марий модыш дене модмо, марий калык мурын чеченлыкшым почын пуымо. Тыгаяк мероприятий 5 январьыште эртен. Тунам Челябинск ола гыч толшо уна-влакым куандарыме.