Марий Эл тӱвыран сулло пашаеҥже Лидия Ильина книгам лукмаште кугу надырым пыштен, шке йырже творческий шӱлышан еҥ-влакым чумырен. Россий Федерацийын Писатель ушемын еҥже, вич книган авторжо Маргарита Ушакова йомакым марий йылме гыч рушыш пеш куштылгын, икшывылан умылен лудаш лийшын кусарен. Книгаште кугу верым сӱрет-влак налыт. Марина Тогубицкая йоча кумылым ужын моштышо художник семын шкенжым ончыктен. Йомак книгам марий поэтессе Надежда Гордеева редактироватлен. Дизайн мастар Юрий Васильев, компьютер йӧнлан эҥертен, тудым верстатлен.
«Российын культурыжо (2012-2018)» Федеральный целевой программе дене келшышын, Печать да массовый коммуникаций шотышто Федеральный агентство книгам лукташ окса полышым пуэн. Тыгак Угарман оласе «Дятловы Горы» издательство савыктымаште полшен. Йомак книгам 3000 экземпляр дене лукмо.
