Сборникым Марий Эл Республикысе «Калык усталык да культурканыш паша шотышто республикысе шанче-методик рӱдер» кугыжаныш бюджет тӧнеж Марий Эл Республикын тӱвыра, савыктыш да калык-влакын пашашт шотышто министерствын полшымыжо дене «Усталык памаш» серий дене савыктен луктын. Автор рӱдерым вуйлатыше Эльвира Куклиналан, методист Борис Дмитриевлан кугу таум ойла.
Палемдыман, сборник калык театр-влаклан полыш семын темлалтеш.
Книгаш пурышо «Ачай, ачием!..» пьесым Марий самырык театрын сценыштыже шындыме. Шыжым самырык театр В. Григорьевын «Рошто уна» пьесыже дене у тургымым почеш.
Саламлена коллегынам, Марий тӱвыра рӱдерын режиссер-постановщикше Валерий Помбеевичым, у паша саскаже дене. Ончыкшымат марий сылнымутым у произведений дене куандараш тӱҥалеш манын ӱшанена.
