Пайрем шӱлышан акцийыш кумылын марий эстрадын артистше-влак: Татьяна Денисова, Анатолий Зарецких, Светлана Яндукова, Володя Матвеев, Артур Ефремов, Эльвира Петрова, Роза Искакова, Эльвира Токташева, Станислав Устюгов, Сергей Пакеев, тӱвыра рӱдер пеленысе «Чон оҥгыр» да «Юкече» ансамбль ден республикысе фольклор коллектив-влак — ушнат. Тыгак вес элла гыч толшо да Йошкар-Оласе вузлаште тунемше-влак марий йылмым палымыштым ончыктат, марий мурым муралтат. Эсогыл киргиз калыкын семӱзгарже, комуз, дене марий мурсемым колышташ йӧн лиеш. Акций жапыште республик кӱкшытан СМИ-влакын пашашт, лукмо продукцийышт дене палыме лияш йӧн лиеш. Тыгак студент-влак, ужалыме верлашке лектын, «тыште марла кутыраш лиеш» наклейкым пуэдат.
«Мый марла ойлем» акцийыште ача-аван вӱрышт дене шыҥдаралтше марий чондам почын кертыда. Сандене шушаш вӱргечын, 26 апрель 18 шагат кастене, пагалыме марий-влак, тендам Чарла Кремльыш алал кумылын вучена. Акций жапыште марий кундемыште лектын шогышо марий газет да журнал дене палдараш тӱҥалыт. Пайремыш толшо чыла калык яра (туак) пура.
