— Пелашемын коваже Прасковья Ивановна ден кочаже Арсений Иванович Зуевмыт сарын участникше лийыныт, — палемдыш Вероника Альбертовна. – Кугезе кованаже прожекторист лийын, шочмо ялысе ӱдыр-влак кокла гыч шкетын 19 ияш сарын кочыжым тамлен, Москвам немыч кашак деч аралымаште аралымаште надырым пыштен. Сеҥымаш кечым Рига олаште вашлийын, «За победу над Германией» медаль дене палемдалтын. Изажат, Капралов Петр Иванович, немыч ваштареш кредалмаште вуйжым пыштен. Пелашыже Арсений Иванович сар годым карел-финн пограничный округысо связь батальонын телефон станцийжын командирже лийын, Ленинград фронтышто кредалын. Нунын подвигыштым, мемнан пиална верч тыршымыштым ме, тукымышт, шарнен илена. «Салтак солык» акцийыште участвоватлымаш – мыланна кугу пиал.
Регион-влак кокласе акцийыш тыгак Свердловск кундем Юа (Юва) марий ял пеленсе «Марий кудо» рӱдер пеленсе тоштерын пашаенже Елена Шуматаеван вуйлатыме почеш ялысе куд ӱдырамаш, Бугалыш кыдалаш школын 8-ше классыште тунемшыже-влак Алина Минигулова ден Татьяна Резных (вуйлатышышт – марий йылме ден сылнымутым туныктышо Джина Гущина), тиде ялысе лудмыверым вуйлатыше Роза Андреева ушненыт. А Марий Эл гыч посна еҥ веле огыл, коллектив-влакат ушненыт.Поснак Советский район Кодам, Шернур район Марисола да Кукнур школ-влакын коллективыштым палемдыман.
Тений чылаже 54 солык пурен. Нуно кум тӱрлӧ тӱсан лийыныт. Тушан салтакын фамилийым, лӱмжым да ачалӱмжым, шочмо да колымо жапшым тӱрлен серыме. Сареш колышо-влак нерген йошкар тӱсан солык «ойлен»: тыгайже латвизыт пурен. Ош тӱсан солык Кугу Ачамланде сареш увер деч посна йомшо салтак нерген ушештарен. Парадыште 10 тыгай солык «каен». Сеҥымаш дене шочмо суртыш пӧртылшӧ да сар деч вара колышо-влак нерген канде солык лийын. Тыгайже эн шуко, кумло, погынен.
Парадыште Салтак солык-влакым нумал эрташ Йошкар-Оласе 14-ше номеран гимназийын шымше класслаште тунемше-влаклан ӱшаныме. Тыгак нуным «Салтак солык» акцийым организоватлыше Республикысе марий тӱвыра рӱдерын пашаеҥже-влак нумалыныт.
— Тыгай акцийым эртарымаш марий калыкнан йӱлажым арален кодымо шонымаш дене кылдалтын, — палемдыш Республикысе марий тӱвыра рӱдер вуйлатыше Наталья Пушкина. – Салтакыш але сарыш кайыше еҥлан, шочмо сурт гыч лектын кайымыж годым, солыкым кучыктеныт. Шочмо сурт-печыш таза, илыше пӧртылаш. Солык дене кылдалтше илыш ситуации йым марий драматург Константин Коршунов « Кеҥеж йӱд» музыкальный комедийыште серен. Адакшым сар пуламыр нерген самырык тукым шарнен
