Конкурсыш вич колоний ушнен. Самодеятельный артист-влак сар годсо да сар нерген мурым да почеламутым, «Штрафник-влак», «Кредалмаш деч ончычсо йӱд» драме сынан  композиций-влакым, «Мыняр шарнена – тунар илат» видеоклипым ончыктеныт. Тыгак шке гыч возымо муро-влакат йоҥгалтыныт, «Экспромт» ВИА-н выступленийжат чылалан келшен.

Жюрин палемдымыж почеш, смотр-конкурсын гран-прижым 6-шо номеран исправительный колонийын самодеятельный артистше-влак сеҥен налыныт. 7-ше номеран колоний икымше верыш лектын. Кокымшо верым 3-шо номеран исправительный колоний налын, кумшым – нылымше. «Усталыкым кычалме кӱкшытлан» («За творческий поиск») приз дене 5-ше номеран колонийын самодеятельный артистше-влак палемдалтыныт.

— Тыгай мероприятий кугурак тукымнам пагалыме кумылым веле огыл, патриотизм шӱлышеш шуарымаште кугу ошкылым ышташ полша, йоҥылыш корныш шогалше-влакын усталыкыштым куштымаштат надырым пышта, — палемдыш жюрин еҥже Наталья Пушкина.