Агавайрем кумалтышлан шиштыжат куанен
Пеледыш пайремлан тӱҥалтышым «Агавайрем» кумалтыш почын. Ончычсо ийласе семынак тудо Пӱнчер отышто верланыше Тумер аланыште эртен. Тудым тӱҥ онаеҥ А.И. Таныгин да районла гыч толшо онаеҥ-влак эртареныт. Марий верам кучышо-влак дене пырля кумалтыш радамын кузе эртымыжым ончал-шымлаш вес кундемла гыч толшо журналист-влакат кумалтышыште лийыныт. Кумалтышын шот-радамже дене эртыме нерген эсогыл пӱртӱс пале каласен: кугу сомыллан ямдылалт шогымо годымак шиште кумалме пушеҥгыш толын шинчын да пашам пытарымеш эре тушто чоҥештылын-пӧрдын, но ик ганат пушеҥгым тӱкалтен огыл.
Саламлымаш мут ятыр йоҥген
Регион-влак кокласе Пеледыш пайрем марий илыман икмыняр республик ден областьла, республикысе чыла район гыч марий-влакым ушен. Тыгак марий пайрем Марий Элыште илыше калык-влакын тӱвыраштым почын пуымыж дене шерге. Чыланат таҥошкылмашке ушненыт.
Торжественный почмаште ял озанлык да шошо ага пашаште кӱкшӧ лектышыш шушо район, озанлык да посна еҥ-влакым палемдыме. Марий Эл Республик Виктер вуйлатышын пашажым жаплан шуктышо А.А. Евстифеев, Оньыжа Э.В. Александров, республикысе НКА-м вуйлатыше-влак пайрем дене шокшын саламленыт.
Мурымо, куштымо, конкурсыш ушымо
Пайрем мурымаш да куштымашлан, тӱрлӧ конкурслан поян лийын. Кажне кундем гыч толшо фольклор коллектив шкевел муро костенечше дене толын. Тыгак нунын концертыштым шӱвырзӧ-влак Куженер район гыч И. Каменщиков ден Морко кундем гыч С. Викторов, тыгак тӱмырзӧ-влак сӧрастареныт. Сергей Викторов гын эше олым шӱвыр дене ныжыл марий семым луктын.
Марий кундемыште илыше тӱрлӧ калыкын концертыштат оҥай лийын. Пайремыш толшо-влак тыгак профессионал семаланыште тыршыше-влакын шоктымышт почеш кушталтен-муралтен кертыныт: «Марий кундем» калык семӱзгар оркестрын концертше лийын. Тудын шоктымыж почеш Я.Эшпай лӱмеш Марий кугыжаныш филармонийын артистше-влак муро-влакым йоҥгалтареныт. «Марий Эл» мурышо да куштышо кугыжаныш ансамбль «Марий мландын ойпогыжо» («Сказания земли марийской») хореографий сынан спектакльым ончыктен.
Марий кундемысе поэт-влакланат пайремыште мастарлыкым почаш йӧным пуымо. Нунын ныжылгын лудмыштым мурызо-бард-влак сӧрастареныт.
Пайремлан сылнылыкым тӱрлӧ конкурс пуэн. «Кудо» конкурсыш чыла район ушнен, шке кундемысе калык йӱлам да тӱвырам кидпаша ончер, сем да вургем гоч почын пуэныт. Провой кундемын «Кудыжо» чыла шотыштат ойыртемалтын, икымше вер дене палемдалтын. Морко район кокымшо, Юлсер кундем кумшо верлаш лектыныт.
«Пеледышлан» — пеледыш» конкурс ончыктен: Марий Турек велысе чолга ӱдырамаш Светлана Конышева эн мотор пеледыш аршашым ямдылен, калык ончылно арален моштен. Звенигово районысо краеведений тоштерын пашаеҥже-влак (вуйлатыше – Виктория Музурова) кокымшо верым налыныт. Советский район гыч Галина Волкова ден Йошкар-Ола гыч Антонина Шакирова кумшо верым пайленыт. «Пеледышлан» — пеледыш» конкурсым «Саскавий» марий ӱдырамаш ушем эртарен.
«Марий ӱдыр – чолга шӱдыр» конкурсыш Татьяна Кудряшова (Шернур район), Виолетта Георгиева (Морко район), Кристина Кутузова (Мари-Турек район), Лариса Ипулаева (Оршанке район), Анжелика Обухова, (Параньга район), Татьяна Кондратьева (Медведево поселко), Лилия Алексеева (Удмуртий), Полина Савельева (Куженер район), Яна Гурьянова (Советский район), Анна Таныгина (Казань ола), Диана Михайлова (Курыкмарий район), Анжела Филиппова (Звенигово район) ушненыт.
Тӱрлӧ таҥасымашан тапыр деч вара сеҥышын лӱмжӧ пале лийын: тиде – Анжела Филиппова. Диана Михайлова кокымшо вер дене палемдалтын. А Лариса Ипулаева кумшо верым налын.
«Марий ӱдыр — чолга шӱдыр» конкурс годым Йошкар-Олашсе сервис технологий техникумын студентше-влак «Этносем» («Этнический мотив») модо коллекцийым ончыктеныт.
«Пеледыш fest» фестиваль марий кундемыште верысе туризмым кузе вияҥден колтымо йӧн-влак дене палдарен.
Икманаш, Регион-влак кокласе кӱкшытан «Пеледыш пайремыш» толшо кажне еҥ шӱм-чонжылан келшыше, кумылжым вӱчкышӧ мероприятийыш ушнен, вий-куатым поген.
