Теҥгече 21 шагатлан Воинский Чап Монумент воктене митинг эртен. Тушто Марий Эл Республикын Виктер вуйлатышын пашажым жаплан шуктышо А.А.Евстифеев лийын. Митинг годым икмыняр шӱдӧ сорта гыч «ШАРНЕНА» («ПОМНИМ») мутым возымо.

22 июнь ныл шагат эрдене Курымаш тул воктене митинг-реквием эртен. Тушто Йошкар-Оласе администраций пашаеҥ, Республикысе тӱвыра да сымыктыш колледжын туныктышо ден тунемше, Марий Эл Республикысе калык-влакын Самырык-влак ассамблейыштын еҥышт, погранвойскаште тӱрлӧ жапыште службым эртыше, тыгак рӱдолаште илыше-шамыч лийыныт. Митингыште черкын настоятельже литургийым эртарен, колледжын тунемшыже Дима Смоленцев Кугу Ачамланде сарыште лӱддымылыкым да патырлыкым ончыктышо кочаже лӱмеш возымо почеламутшым лудын, К.Симоновын «Жди меня» почеламутшат митингыш толшо кажне еҥын шӱмыш логалын.

Таче 11.45 шагатлан Воинский Чап Монумент воктене митинг эртаралтеш, а 12 шагатлан Йошкар-Олаште Шып минутым увертарыме: оласе тӱрлӧ районышто тудын тӱҥалмыж нерген сигнал лиеш. Вуйым савалтен, киддам шӱмыш пыштен, Кугу Ачамланде сареш колышо да тудым эртыше, но сар деч вара илыш дене чеверласыше-влакым шарналтыза.