Тыгай кугу событийлан тале марий активист Евдокия Евдокимовна Соловьеван вуйлатыме «Ший корно» мер толкын чаплын ямдылалтын: Келшымаш пӧртыштӧ марий тоштерым почыныт. Н.В.Пушкина ден В.В.Михайленко тудым почмаште лийыныт, тудлан ончыкыжымат вияҥаш да марий тӱвырам тӱняште шарымаште сай ошкыл семын аклен ойленыт. Тоштерым «ший корнызо-влак» мӧҥгышт гыч кондымо тошто арвер, марий вургем, тӱрлӧ документ да книга-влак деч посна фотографий дене сӧрастареныт. Войзыктышыже мер толкынын 20 ияш пашажым радамлен.
«Ший корно» мер толкын «Российысе марий-влакын федерал калыкле-тӱвыра автономий» Мер организацийын составышкыже пура. Тудын советшым вуйлатыше Лариса Николаевна Яковлева марий тӱвырам вияҥдымаште, калык-влак коклаште мер пашам шуктымаште кугу надырым пыштыше «ший корнызо-влак» Вениамин Александрович Абдуллиным, Дмитрий Беляевым, Анастасия Вадимовна Беляевам, Денис Викторович Михеевым, Василий Васильевич Соколовым, Евдокия Евдокимовна Соловьевам, Вячеслав Ксенофонтович Четкаревым да Екатерина Вадимовна Шабдаровам Чап танык дене палемден. Тудым марий активист-влаклан ФНКА-н исполкомжым вуйлатыше Наталья Васильевна Пушкина калык ончылно тауштен кучыктен.
1 июльышто марий тӱвыран сылнылыкше да ойыртемже нерген регион-влак кокласе «Пеледыш пайрем» рашын каласкален. Тушто Санкт-Петербургышто да Ленобластьыште чумырымо марий мурышо да куштышо коллектив-влак деч посна Марий Эл гыч «Ӱшанлык» фольклор (Провой кундем Какшамарий ял) ансамбль шке мастарлыкшым ончыктен. Россий Федерацийын да Марий Эл Республикын тӱвыран сулло пашаеҥже Фаина Викторовна Эшмякован вуйлатыме «Шыжарвлӓ» йоча образцовый кӱслезе ансамбльын ӱдыржӧ-влакым ончаш толшо калык пеш шокшын вашлийын. Палемдыман, марий пайрем Всеволожский район Приютинысе тоштер-пӧрт воктене, пӱртӱс лоҥгаште, эртен. Коми калыкын Санкт-Петербургысо общиныже марий-влакын пайремыштышт шерге уна лийын, саламлымашыштым мураршаш дене пеҥгыдемденыт. Тыгак «Ugrin Paikka» финн-угор пӧрт дечат Пеледыш пайрем дене саламлымаш пурен.
Пайремын организаторжо-влак йоча-влак нергенат монден огытыл: «Мый кидпашам йӧратем» флешмоб годым аралтыш курчакым, кагаз гыч пеледышым ышташ туныктымо.
Пеледыш пайрем пеш веселан эртен, кас марте Приютинысо тоштер-пӧрт воктенысе аланыште марий муро йоҥген, кӱсле йӱк кумылым нӧлтен, гармонь почеш йыркуштымашат лийын, кандырамат пунымо. Тыгай пайрем шкешамым нӧлта, марий улмо дене кугешныме кумылым луктеш.
