Пайремым почмаште Марий Эл Республикын тӱвыра, печать да калык-влакын пашашт шотышто министрын икымше алмаштышыже В.И.Актанаев, Оршанке район администраций вуйлатыше Л.Н.Безденежных, Оньыжа Э.В.Александров, Республикысе марий тӱвыра рӱдер вулатышын алмаштышыже Р.А.Юрьева, Волковмытын лишыл да тора родо-тукымышт лийыныт да ойленыт.
Фестиваль-конкурсышто сеҥыше-влакым кок номинацийыште палемдыме. «Вокал» ужашыште шкетын (соло) да тӱшкан (дуэт але ансамбль) мурышо-влакын мастарлыкышт посна ончымо. «Инструментальный» номинацийыш тӱрлӧ семӱзгар дене шоктен мурышо-влак ушненыт.
Посна мурызо-влак коклаште Йошкар-Ола гыч Зинаида Рыбакова (3-шо вер), Морко район гыч Анатолий Александров (2-шо вер), Куженер район гыч Евгений Каменщиков (1-шо вер) ойыртемалтыныт.
Дуэт да ансамбль-влак коклаште Йошкар-Ола гыч Алексей Кленов ден Серафима Садовина (3-шо вер), Республикысе марий тӱвыра рӱдер пеленсе «Чон оҥгыр» фольклор ансамбль (2-шо вер), В.Лазарев лӱмеш академический хорын ӱдырамаш хоржо (1-ше вер) сеҥышыш лектыныт.
«Инструментальный» номинацийыште сеҥыше-влакын лӱмышт: Ирина Кудрявцева (Оршанке район) — 3-шо вер, «Висвис» ансамбль (Советский район) — 2-шо вер, «МИФ» вокально-инструментальный ансамбль (У-Торъял район) — 1-ше вер. А гран-прим Оршанке районысо «Какшан сем» фольклор коллектив сеҥен налын.
Фестивальын участникше ден унаже-влак «Мастар-влакын ола» ончерыште республикысе кидмастар-влакын пашашт дене лишкырак палыме лийыныт, мастар классыште практик шинчымашым налыныт. Тунемше-влак радамыш Эстоний гыч толшо «Хаанья волостьын куштымаш, модмаш да муро Обществе» мурышо да куштышо коллектив, Иваново ола гыч толшо турист-влак ушненыт. Эстон уна-влак концерт программе дене выступатленыт, куштымашыштлан туныктеныт, марий сем почешат тавалтеныт.
«Эҥер вӱд ӱмбалне» вокал да инструментальный коллектив-влакын республик кӱкшытан 2-шо фестивальым «2013-2020 ийлаште Марий Эл Республикысе кугыжаныш национальный политике» Кугыжаныш программым илышыш шыҥдарымылан кӧра эртарыме. Тудын негызеш Республикысе марий тӱвыра рӱдер проектым возен да сеҥен. Рӱдерын пашаеҥже-влак конкурслан ямдылалтме да тудым эртарыме, фестиваль жапыште вес тӱвыра программымат ямдыленыт да эртареныт.
Фестивальым эртарымаште тыгак Оршанке районысо тӱвыра пӧлка, Тошто Крешын ялын пашаче калыкше да верысе кидмастар Виталий Кудрявцев кугу надырым пыштеныт. Верысе калык уна-влакым марий кочкышым сийлен вашлийын, пайремым эртарыме аланым эрыктен, сценымат, эҥер сереш теҥгылымат келыштарен, «Мастар-влакын олаштымат» «чоҥен».
Фестивальым эртарымаште сай полышым тыгак ИП Э.А.Кольцов («Лед и пламень кевыт-влак), ИП Н.Сидоркин, «Марий Эл» ден «Кугарня» газет редакций-влак пуэныт.
Фестивальын участникше-влак ойлат:
Светлана Питиримова, Волжский район:
— Фестивальын марий калыкым иктеш ушнымаште вийже кугу. Тидлан организатор-влаклан таум каласыман. Евгений Волковын мурыжым изинек йӧратен муренам да мурем.
Анатолий Александров, Морко район:
60-шо ийыште йӧратыме ӱдырем марлан пуэнам. Ик пӧртыш мыят пуэнам. Окнаште «Ончыко» журнал кия ыле, комышто мурым печатлыме мурым ужмеке, кушкед нальым. Варажым тудым тунемынам да кызытат шарнем. Евгений 1964 ийыште тукым акам марлан налын. Илыме пӧлемышкышт мыят лийынам. Мурыжым тунеммем нерген ойленам. Пырля муренна. Арсий изажымат паленам, «Ӱдыр кумыл» пьесыжым Морко театр шынден. Мый тӱҥ рольым (Самсон Романович) модынам. Мурыжо «Шып кастене садыш лектын» маналтеш. Тудымак йоҥгалтаренам.
