Пайрем эртыме жапыште ялозанлык кочкыш сатум предприятий, фермер да шке озанлыкым кучышо-влак ужалаш тӱҥалыт.
«Угинде» пайремлан весела кумылым республикысе районла да марий-влак илыман регионла гыч фольклор коллектив-влак пуртат.
Шыже — пакчасаска лектышым иктешлыме пагыт. Мландым ава семын семалыме кажне оза, ӧрыктарыше емыж-саскаж дене кугешнен, весе-влакым палдарен кертеш. Тидлан «Шыжын йокмаже» («Дары осени») фотоконкурс полша. Тушко ушнаш Республикысе марий тӱвыра рӱдерын сайтыш (mari-centr@mail.ru) але контактыш (vk.com/marityvraryder) фотографийым колтыза.
«Угинде» пайрем годым ожно тӱред налме у пырче гыч йоҥыштымо ложаш гыч пыштыме киндым пелештен посленыт, у пырче гыч пучымышым шолтеныт. Тиде йӱлам теният шукташ тӱҥалына – тӱрлӧ шӱраш гыч келшымаш манме пучымышым шолташ «Угинде» пайремын участникше ден республикыште илыше тӱрлӧ калыкын ӱдыр-эргышт полшат.
