Марий Эл Республик Вуйлатышын икымше алмаштышыже, тӱвыра, печать да калык-влакын пашашт шотышто министр М.З Васютинын кидпалан саламмутшым Республикысе марий тӱвыра рӱдерын директоржо, «Российысе марий-влакын калыкле-тӱвыра автономий» Мер ушемын исполкомжым вуйлатыше Н.В.Пушкина Геннадий Александровичлан кучыктен. Тыгак Наталья Васильевна Г.А.Мальгинлан Марий тӱням чапландарымаште чолгалыкым ончыктымыжлан, марий тӱвырам вияҥден шогымаште кугу надырым пыштымыжлан марий тӱвыра рӱдерын Чап таныкшым кучыктен.
ФНКА Советым вуйлатыше Л.Н.Яковлева саламмутыштыжо тыге серен: «Татарстан кундемыште веле огыл, Россий мучко марий йылмым да тӱвырам арален да вияҥден шогымо сомылым Те, Геннадий Александрович, Менделеевск кундем Элнет ялыште тыгаяк лӱман фольклор ансамбльым чумырымо да 40 ий тудым моштен вуйлатыме дене шуктен шогеда. Тынар пагытыште мыняр марий йоча тӱвыра паша деке шӱмаҥын, марий йылмыжым утларак пагалаш да аклаш тӱҥалын – тидлан Тыланда кугу таум ойлена. Памаш гыч эҥер тӱҥалеш манме семын ыштен шогымо пашада марий тӱвыранам кумда Россий да финн-угор тӱня мучко шараш полша». Поро тыланымаш дене тудым ФНКА Совет вуйлатышын алмаштышыже, Татарстан Республикысе регион кӱкшытан марий-влакын калыкле-тӱвыра автономийым вуйлатыше О.А.Третьяков юбилярлан кучыктен.
Йоча ден самырык-влаклан республикысе марий театр-рӱдерын исполнительный директоржо, Оньыжа Эдуард Александров, шокшын саламлен, мер пашаште сай лектышыш шумым аклен, Чап таныкым кучыктен. Икымше номераным! М.Шкетан лӱмеш Марий кугыжаныш драме театрын администраторжо Алиса Михайлова юбилярым шокшын саламлен, Марий Эл гыч толшо уна ден артист-влакым порын вашлиймылан тауштен ойлен.
Г.А.Мальгиным шочмо кундемже сай пашаеҥ, чолга айдеме семын акла да пагала. Тудым саламлаш Менделеевск район администрацийым вуйлатышын социальный паша шотышто алмаштышыже К.Г.Макаров, Монашево ял администарцийым вуйлатыше Р.Ф.Иосифов толыныт. Саламлыше-влак ятырын лийыныт: тидым тӱрлӧ калыкын муро да куштымашыж гоч палаш лийын. «Элнет» калык фольлор коллектив шкевел муро да куштымаш ойыртемын ямжым почын пуэн.
Тӱвыра пашаеҥын творческий касше ончыктен: икте-весым умылен да пагален моштымаш пашалан сай шӱкалтышым ышта, мер илыш йогыным вияҥдаш полша.
