Пайрем жапыште марий модыш-влак дене палыме лияш, тушто шке вийым тергаш йӧн лиеш. Эсогыл ӧранвочко дене ӱйым ӱчаш-ӱчаш шӱшкаш тӱҥалыт. Тыгак моло таҥасымашат лиеш. Тушко кажныже ушнен кертеш, пайремын спонсоржо-влак сай пӧлекым ямдыленыт.
«Угинде» пайрем чеслан да мурымаш-куштымашлан поян лиеш. Республикысе чыла гаяк район, Йошкар-Ола гыч марий да татар фольклор коллектив-влак шке мастарлыкыштым почыт. Тыгак Татарстан кундем Элнет ял да Киров вел Уржум гыч ансамбль-влак «Угинде» пайремын унаже лийыт. Чылаже 9 коллектив муркостенечым пӧлеклат. Чыла тидым ужаш чыладамат пайремыш пагален ӱжына. Марий калыкнан тошто йӱлажым тачысе илыш-кун гоч почын ончыктышо мероприятийыш кажне марий еҥым, марий кумылым аклен моштышо пошкудына-влакым пагален ӱжына. Тыгай пайремым кушкын шогышо тукымат палышаш улыт, сандене йоча але уныка-влакым пырля налза, нунат пайрем жапыште капкылым лывыртен, модышлашке ушнен кертыт.
Республикысе марий тӱвыра рӱдерын увертарыме «Дары осени» («Шыжын йокмаже» фотоконкурсыш садпакчазе-влак ушненыт. Кӧн тушто вийым тергаш кумылжо уло гын, 18 октябрь марте фотом колтен кертыда.
Регион-влак кокласе «Угинде» пайремым Республикысе марий тӱвыра рӱдер «Российысе марий-влакын калыкле-тӱвыра федерал автономийышт» Мер ушем да «Чарла Кремль» информаций да турист рӱдер дене пырля эртара. Марий калыкнан тошто пайремжылан у шӱлышым пуртен, илышыш шыҥдараш Марий Эл Республикын тӱвыра, печать да калык-влакын пашашт шотышто министерстве да Марий Эл Республикын ялозанлык да кочкыш сату министерстве полышым пуат.
