Колтымо фотосӱрет-влак гыч ужына, чынжымак, ял лӱмоҥа-влакым марий йылмышке кусарыме огыл. Чендемерово марлаже — Чылдемыр, Большая Коклала — Нольыкмарий, Кужнурово — Кужнур, Куприяново — Купран лийыт.

Ушештарена, кузе тыгай годым закон ышташ кӱшта. «Россий Федерацийысе калык-влакын йылмышт нерген» законышто «Географий объект, возыш, корнысо да моло ончыктымо пале-влакын лӱмыштын йылмышт» лӱман V ужашын 1-ше пунктыштыжо тыге возымо: «Написание наименований географических объектов и оформление надписей, дорожных и иных указателей производятся на государственном языке Российской Федерации. Республики вправе написание наименований географических объектов и оформление надписей, дорожных и иных указателей производить на государственных языках республик наряду с государственным языком Российской Федерации». Тидын нерген «Нормативно-правовая основа языковой политики Республики Марий Эл» (Йошкар-Ола, 2016) книгаште лудын кертыда.

Закон почеш корнысо але моло ончыктымо пале-влакым Россий Федерацийын кугыжан йылмыже дене пырля республикысе кугыжан йылме (олыкмарий да курыкмарий литератур нормо-влак) денат возаш лиеш. Тидлан закон правам пуа.
Иктешлен ойлаш гын, Марий Элын кажне кундемысе администрацийын ялысе лӱмоҥа-шамычым марий йылме дене возаш праваже уло.

Таумутым Сергей Милютинлан каласена. Умбакыжат мыланна полшен шогыза.

Н. Тимофеева.