Диктантым марий йылме дене мутланен, возен моштышо кажне еҥ возен сеҥа. Тушко школлаште, кыдалаш да кӱшыл тунемме тӧнежлаште шинчымашым погышо тунемше але студент, туныктышо, шанчызе, кугыжаныш да муниципал тӧнеж-влакын пашаеҥышт ден вуйлатышышт, тӱвыра сферыште тыршыше да журналист-влак ушнен кертыт. Тудо Йошкар-Олаште Марий кугыжаныш университетын Калыкле тӱвыра да культур кокласе кыл Институтышто эрта. Адресше тыгай: Йошкар-Ола, Кремлевский урем, 44-ше пӧрт.
9 шагатлан регистраций тӱҥалеш. Диктантым 10 шагатлан возаш тӱҥалыт.
Ончычсо ийласе семынак марий диктантым возымашке Российысе чыла регионысо муниципалитет, посна тӧнеж, тыгак йот эл-влак ушнен кертыт. Тидлан тусо организаторлан але ответственный еҥ-влаклан 4 декабрь марте Калыкле тӱвыра да культур кокласе кыл Институтыш (markaf@marsu.ru) йодмашым колтыман. Тидын годым электрон адресым сераш мондыман огыл. Диктантын текстше 6 декабрьыште 9 шагатат 45 минутлан йодмаш-серышеш палемдыме электрон адресыш колталтеш
Муниципал кучемыште але посна тӧнежлаште, ӧрдыж кундемлаште эртарыме диктантым тусо организатор-влак шкеак тергышаш да сеҥыше-влакым палемдышаш улыт. Иктешлымашым (мыняр еҥ возен, сеҥыше але призер радамыш кӧ логалын) кӱшнӧ палемдыме электрон адрес дене колтат. Тиде сомылым 7 декабрь 10 шагат марте ыштен шуктышаш улыт.
Йошкар-Олаште «Марла чын возена» диктантым иктешлымаш 10 декабрьыште Марий тиште кечылан пӧлеклалтше пайрем годым эртаралтеш. Тудо М.Шкетан лӱмеш Марий драме театрыште эрта.
