Йӱштӧ кугыза ден Лумӱдыр, Лумъеҥ ден Поран оза, Кугыльдык ден Пыгыльдык лӱман Пӱгыльмо-влак йоча-влакым мурыктеныт, куштыктеныт, оҥай модыш дене модыктеныт. Йоча-влакат ӧрдыжеш кодын огытыл: Йӱштӧ кугыза лӱмеш почеламутым марла йоҥгалтареныт, модмашкат кумылын ушненыт. Тудыжат икшыве-влаклан шере пӧлекым куанен кучыктен.

Пайрем эртарымаште волонтер сомылым Марий кугыжаныш университетын студентше-влак шуктеныт, йоча-влак дене пырля кож йыр пӧрдыныт, мурым муреныт, модмашке изи-влакым ушаш полшеныт.

Марий У ий ёлкым Республикысе марий тӱвыра рӱдер эртарен.