«Марий Эл Телерадио» кугыжаныш автоном тӧнежыште радиопрограммын авторжо да вӱдышыжӧ Наталья Пушкина ден «Газета «Марийская правда» ОАО-н генеральный директоржо-тӱҥ редакторжо Сергей Дружинин школын кураторышт улыт.

Регионлаште почылтшо школын тунемшыже-влакым икгай программе дене туныкташ тӱҥалыт. Чылаже 32 шагатым ойырымо, тиде жапыште 32 темым палемдыме. Этнос-влак кокласе кыл шотышто темылан серыше журналистын этикыже, СМИ ден кучемын вашкылышт да кызытсе жапыште пӱсын шогышо моло йодышымат рашемдат. Занятий арняште ик-кок гана эрташ тӱҥалеш.

Курсын ойыртемже семын практик пашалан шукырак жапым ойырымым шотлыман. Тунемме жапыште студент-влак фестиваль ден конференцийлаште лийыт, тӱрлӧ СМИ-шке, тӱрлӧ жанрлан эҥертен, материалым возат.

Межэтнический журналистик школын тунемшыже радамыш «журналистике» да тудын деке чак шогышо специальностьым налше-влак ушнен кертыт. Тыгак самырык журналист-влакым ӱжына. Ийгот шот дене 28 ияш марте самырык еҥ ушнен кертеш. Тунем лекше-влаклан сертификатым кучыктат.

Июньышто Москваште, М.В.Ломоносов лӱмеш Моско кугыжаныш университетыште, иктешлыше конференций эртаралтеш. Тушко школын эн сай студентше-влак колталтыт. Теве кодшо ийыште Россий кӱкшытан мероприятийыште Наталья Пушкина ден «Морко мланде» район газетын самырык журналистше Настя Муравьева лийыныт.

«Российысе медиа-кумдыкышто келшыдымаш йылмылан альтернативе» курсым межэтнический журналистик Гильдий (вуйлатыше — Маргарита Лянге») Россий Федерацийын Президентшын грантшылан эҥертен эртара.

«Межэтнический журналистик школышто» ешартыш шинчымашым налаш кӧн кумылжо уло гын, (8632)45-88-51 телефон дене йыҥгыртен возалт кертыда але mari-centr@mail.ru электрон адресыш йодмашым возыза.