Туныктыш сынан мероприятий Российысе калыкын да йот элласе йылмым тунемаш кумылаҥдыме, Марий Элыште илыше тӱрлӧ калык гыч лекше самырык тукым коклаште тӱрлӧ велым кылым пеҥгыдемдыме, йылмын кӱлешлыкшым да чапшым нӧлтымӧ амал дене эртаралтеш. Тушко вуз ден техникумлаште шинчымашым погышо студент-шамыч, тыгак аспирант ден туныктышо-влак ӱжалтыт, вес калыкын тӱвыражым аклыше да йылмыжым палаш кумылан чыла еҥ толын кертеш.
Фестивальыште эртыше ийысе семынак вес калыкын кутырымо йылмыже да тӱвыраже дене палдараш тӱҥалыт.
«LINGVA-территорий» йылме фестиваль Марий кугыжаныш университетын Калыкле тӱвыра да тӱвыра кокласе коммуникаций институтыштыжо эртаралтеш. Адресше тыгай: Кремлевский урем, 44 пӧрт. Мероприятий 13 шагатлан тӱҥалеш.
Ушештарена, эртыше ийысе фестиваль годым марий, руш, татар, туркмен, таджик, азербайджан, араб, француз, узбек, армян, венгр, удмурт, финн, эстон, хинди да киргиз калыкын тӱвыра да йылме, кочкыш-йӧрвар ойыртемышт дене палыме лийме.
