Марий драматург да писатель Арсий Волков «Илыш толкын» романыштыже Ӱярням пайремлыме нерген тыге возен:

«Ӱярня толын шуо. Теле дене чеверласыме арням Крешын велне кумдан палемдат. Оза-влак, пайрем чесым ямдылен, унала толшо мӱндыр родыштым ончат, пошкудышт дене ваш йӱын-кочкын коштыт. Ӱярня годым Кандратий Васлий тӱрлӧ мыскара дене калыкым воштылташ йӧратен. Шоҥгын колымекыже, Оляй Миколай тудын койышыжым коеш. Тудо изи капан, моткоч мыскараче еҥ, Кандратий Васлий дене кугу родо ыльыч. Йолташ деч посна кодмекыжат, тудо ыш лыплане. Пайрем годым калыкым воштылташ манын, Оляй Миколай имне шӱйыш да тупыш шӱкшӧ йыдал ден тошто выньыкым сакален. Ял мучко мурым мурен кудалыштын:

Ӱярня — йор-йор-йор!

Мелна – чож-чож-чож!

Пӧрт еда пуреден, суртоза ден ешыжым шошо пайрем дене саламлен. Поро сугыньжылан таум ыштен, тудым когыльо, мелна дене сийленыт.

Ӱярнян эн тӱҥ модышыжо Яку коремыште эртен. Каче-влак курык тайылыште мунчалташ кужу вара-влакым ныл кутышын йыгыре шуйдарен пыштеныт да вӱд дене кылмыктен ягылтареныт. Ӱдыр-рвезе-влак, кок вараш ваш шогалын, иян корно дене писын мунчалтен воленыт. Яку кӱкшакаште – кече мучко йӱк-йӱан. Эр гычак йоча-влак юарлаш тӱҥалыт. Кечывал деч вара рвезе калык гармонь дене погына. Тыште кас марте куштымо, мурымо йӱк шергылтеш».

Ӱярня годым калык мурен-куштен гына огыл, игечымат шекланен.

 — Ӱярня шочмын лум лумеш — кияр шочеш, кушкыжмын — шуко понго шочеш, вӱргечын — шурно лектыш куандарышаш.

 — Ӱярняште могай кечын эн сай, леве лиеш, вес гана тудо кечын шыдаҥым ӱдат.

 — Ӱярня деч вара латкок поран лиеш.

 — Иӱсус кужу гын, пырчан шурно лектыш сай лиеш.

Ӱярня кечылаште лавыран вургемым мушкаш ок йӧрӧ, киндет шӱч вуян лиеш. Вынерым куашат, ургашат ок лий – кеҥежым осал тӱтан, шолем уржа озымым пытарен кертыт.

Тыгак тыгай пале-влакат улыт. Ӱждымӧ уна порым конда. Тудын толмыжлан еш йывыртен, молан манаш гын пиалым конда, маныныт.

Ӱярня арняште озавате мыняр мелнам кӱэштеш, ешыште идалык мучко тынар кечан кече лийшаш. Мелнажым ятыр кӱэштман, но тидын годым утыждене шуко кӱэштман огыл, молан манаш гын игечыже ятыр жап кукшо шога гын, пасу лектышан огеш лий.

Ӱярня кечылаште лавыран вургемым мушкаш ок йӧрӧ, киндет шӱч вуян лиеш. Вынерым куашат, ургашат ок лий – кеҥежым осал тӱтан, шолем уржа озымым пытарен кертыт.