Коллективыш ий еда у еҥ-влак ушнат. Кодшо ий гыч «Чон оҥгырым» тале гармоньчо да организатор Эльвира Петрова вуйлата. Толмекыже ужеш, йӱла муро-влакым йоҥгалтарыме годым тӱмыр пералтыме йоҥгылыкым пурта, а ансамбльыште тӱмырзӧ лийын огыл. Умылен, фольклор коллектив тӱмырзӧ деч посна лийшаш огыл. «Кӧм ӱжаш», — манме йодыш шоген огыл – Раиса Краснован марий семӱзгарым сайын пералтен моштымыжым пален. Тудыжат вуйым шупшын огыл, толын. Ныл ий ончыч «Чон оҥгыр» фольклор коллективыш иканаште кум чулым ӱдырамаш ушнен. Тиде — Валентина Токтаулова, Алевтина Алметова ден Галина Трофимова. Нуным йӧратыме коллективыш Тамара Шелеметьева ӱжын.
Ансамбльын шочмыж годсек тушко ушнышо-влак таче мартеат куанен коштыт, калыкым сылне мурышт дене куандарат. Теве Роза Конакова Медведево районысо да Йошкар-Оласе школлаште математикым туныктен, каныш кечылажым марий ансамбльыште эртарен. Вич ий утла Магадан кундемыште илыме годым веле жаплан кораҥын.
Эше кодшо курым шымлумшо ийлаште марий рӱдолаште калык усталык пӧрт талын пашам ыштен, ола марий-влакым ушен. Тиде усталык пӧрт пеленсе ансамбльыштак марий койышыжым Зинаида Рыбакова шуарен, «Чон оҥгыр» шочмо годсек ансамбльын ик эн тале мурышо-куштышызо. Зинаида Кошкина 90-шо ийлаште эртараш тӱҥалме «Марий касыште» артист койышыжым почын. Эсогыл Сеҥымашын XXX идалыкше лӱмеш тӱвыра полатын администрацийже (тунам тушто «Марий кас» эртен) Зинаида Игнатьевналан эн чулым участнице семын чап таныкым кучыктен.
Ийгот шот дене ончалаш гын, ансамбльыш коштшо-влак тӱрлӧ ийготан улыт. Но ийгот чон да капкыл моторлыклан чарак мо?! Теве Елена Федоровна Коротковалан 79 ий. Тудын сценыште муралтен-кушталтен колтымыжым ончен, вачӱмбакыже тынар идалыкым пыштен манын отат шоналте. Очыни, уныкаже гаяк куштылго могыран да талантан. Ала уныкаже, Э.Сапаев лӱмеш опер да балет театрын солистше Константин Коротков, коважын капкыл лывыргылыкым налын?! Таисия Петрова, Зинаида Васеева ансамбльым почмо годсек чолга участницыже улыт.
Кеч-могай коллективым вургем сӧрастара. Тидын шумлык «Чон оҥгыр» кугу йӧндымылыкым огеш шиж. Тӱрлышӧ-ургышо шке коклаштыштак улыт.
— «Чон оҥгыр». Тыгай йоҥгыдо лӱмым нумалше коллектив республикыштына укеат, очыни, — палемдыш фольклор коллективым вуйлатыше Э.В.Петрова. — Тушко эн тале, патыр вате-шамыч коштыт, дисциплине пеҥгыде. Кажне выступленийлан кумылын ямдылалтына, сценыш лекташ йодыт — вигак тарванен каен кертына. Южгунамже арняште кум-ныл вере выступатлена. Йошкар-Ола, Советский, Медведево, Оршанке районлаште мемнан мастарлыкнам акленыт, шоҥгыеҥ пӧртлаште илыше-влак, муралтен колтымынам колын, куан шинчавӱдыштым ӱштылыныт. Тыгай вашлиймаш-влак «Чон оҥгырын» участницыже-влакынат кумылыштым нӧлталыныт.
Ансамбльын репертуарже поян: тӱрлӧ вере илыше марий-влакын, йӱла пайрем мурышт-влакым пуртымо. Тидын негызеш Республикысе марий тӱвыра рӱдер «Марий йӱла пайрем муро-влак» муро сборникым савыктен луктын.
«Чон оҥгыр» ансамбль шке ешышкыже у еҥ-влакым ӱжеш. Коллективыш ушнаш кумылан-влакым Республикысе марий тӱвыра рӱдерыш толаш але йыҥгырташ йодына.
Адресна тыгай: Йошкар-Ола, Первомайский урем, 109 №-ан пӧрт, 115 кабинет. Тел. 8(8362) 45-88-51.
