Марий Элыште шӱдӧ наре тӱрлӧ калык ила. Кажныже шке йылмыже, тӱвыраже дене ойыртемалтеш. Чыла тидым пайрем сынан мероприятийыште ужаш лиеш. Республикыште пашам ыштыше калыкле-тӱвыра автономий-влакын вуйлатышышт тӱҥалме сомылым сайлан шотленыт да тудым эртарен колташ поро кумылым почыныт. Тудо калык-влак кокласе келшымаш кылым пеҥгыдемдымаште кугу ошкылым ышташ полша.

Фестиваль жапыште марий, руш, татар, грузин, еврей, осетин, армян, белорус, украин, одо, азербайджан калыкын кухньышт дене палдараш тӱҥалыт. Пайремыш толшо-влак кочкыш-сийым тамлыме гутлаште калык-влакын тӱвырашт нерген муро-куштымашышт, йӱлам ончыктымо гоч пален налыт.