Тӱвыра рӱдерын методистше Эльвира Петрова йӱла муро-влакым чын мураш туныктен. Марий Эл Республикын калык артистше, Марий кугыжаныш университетын тӱвыра да сымыктыш кафедрын доцентше Нина Макарова йӱла куштымашым шындыме годым ойыртем-влак дене палдарен, кушташ туныктен. В.М.Васильев лӱмеш йылмым, сылнымутым да историйым шымлыше Марий шанче институтын пашаеҥже Ольга Калинина марий йӱла пайрем-влакын ойыртемже нерген каласкален, шке ойжым видеоончыктыш дене пеҥгыдемден. Марий Эл Республикын калык артистше, Республикысе йоча да самырык-влаклан театр-рӱдерын режиссержо Зинаида Долгова калык пайремым эртарымаште режиссурын могай лийшаш — тидын нерген умылтарен.

Практик занятий да мастар класс деч вара йыргешке ӱстелым эртарыме. Тушто тӱвыра рӱдерым вуйлатышын алмаштышыже Римма Юрьева, Уржум районын тӱвыра управлений вуйлатыше Алсу Григорьевых, усталык лабораторийын участникше-влак лийыныт. Тушто тыгай иктешлымашым ыштыме: кушкын шогышо самырык тукымым йӱла пайремым эртарымашке ушнышт манын, эн ончыч ешлаште марла туныктыман, еш пайрем-влакым эртарыман. Тыгак пайрем-влакым эртарыме годым у йӧн-влакым, мондалтше йӱла-влакым пуртыман. Уржум вел тӱвыра пашаеҥ-влак ончыкыжым марий тӱр, марий калык вургемын ойыртемже нерген пален налаш кумылан улмыштым ончыктеныт, куштымаш да мурымаш ойыртемымат угыч шергал лекташ кумылан улыт, видеоончыктыш дене шинчымашым пеҥгыдемдаш йодыныт. Марий тӱвыра рӱдер деч нунылан полыш семын марий йӱлам, муро-влакым пуртыман книга-влакым кучыктымо.