Тушто слет кузе эрташ, могай программе почеш пашам ышташ тӱҥалеш – йодышлам рашемдыме. «Марисола туризмым вияҥдыме шотышто ончылно. Черке селаштат верланен гынат, марий йӱлам шуктен шога, отышкат лектеш, — палемдыш школ вуйлатыше Алевтнна Максимова. – сандене тиде шӧрынымат самырыктукымлан ончыкташ да туныкташ кӱлеш». Тыгак марий йӱла пайрем-влакым тыште арален коденыт, шуктен шогат. 2018 ий волонтер-влакын идалыкышт семын эрта. Тиде йодышат слетышто ик тӱҥ семын кодшаш. Актер усталыкым почшо, сылнымутым возымо мастар-класс-влакымат эртараш кӱлмым палемдыме. Марисола кундем марий кундемлан ятыр лӱмлӧ писатель-поэт да артист-влакым куштен. Нуно самырык ӱдыр-рвезе-влак дене пашам ышташ кумылыштым почыт.
Тиде да моло йодыш-влакым слетын программыжым ыштыме годым шотыш налалтеш. Марий самырыктукым слет 18 гыч 30 ияш марте 120 наре ӱдыр-рвезе-влакым чумыра.
Лариса Николаевна Яковлева, Наталья Васильевна Пушкина да Валерий Александрович Мочаев Марисола кыдалаш школышто лийыныт, слетым эртарыме шумлык йодыш-влакым рашемденыт.
Поро шомакым Марисола кыдалаш школын коллективше, вуйлатыше-влаклан каласыман. Тыште йоча-влакым эсогыл кок пачашан тӧнежын пырдыжше туныкта, телыже-кеҥежше тушто тӱрлӧ пеледыш кушкеш.
