Тыгай лӱмым налшаш верч Марий Эл Морко районысо Унчо села, Пермь кундем гыч Архангельский села да Венгрийысе Зирц ола йодмашым пуэныт. Марий Эл гыч Унчо села нерген каласкалаш, тудын чапшым аралаш Морко район администрацийын тӱвыра, спорт да туризм пӧлка вуйлатышыже Дина Павлова, Я.Эшпай лӱмеш Марий кугыжаныш филармоний вуйлатыше Эрик Юзыкайн да «Марий ушем» вуйверын еҥже Василий Петров миеныт.

Республикысе марий тӱвыра рӱдер Морко да Унчо калыкын кугу сеҥымаш дене саламла да марий тӱвыра илышым тӱнямбал кӱкшытыштӧ почын пуаш тылана. Тыште шке надыржым марий тӱвыра рӱдерат пышташ ямде.

Тиде сомылым уже тӱҥалме: 15 апрельыште Унчо селаште марий Кугече пайрем эртаралтеш. Пайрем кышкарыште Унчо вел калык «У тувырым чиктымаш», «Кугече лӱҥгалтыш», «Ташлама корка» йӱла-влакым ончыкташ тӱҥалыт. Пайрем 11 шагатлан тӱҥалеш. «Кугече» Mari-folk пайремым республикысе фольклор коллектив-влак сӧрастараш тӱҥалеш.

Республик кӱкшытан мероприятийым Республикысе марий тӱвыра рӱдер Марий Эл Республикын тӱвыра, печать да калык-влакын пашашт шотышто министерствын, Морко район да Унчо ялысе администраций-влакын полшымышт дене эртара.