Геннадий Леонидович Сабанцев Кужэҥер кундемысе Йырмарий ялеш шочын, но йоча жапше, кушмо пагытше Аганур ялыште эртен. Сандене чон саскажым чумырышо ойпогыж дене палдарыме пайремымат (презентацийым) тиде ялыштак эртара. Тудо 19 майыште 14 шагатлан И.Одарым шарныме кӱ воктенысе чатка аланыште почылтеш.

Тыште поэт шке землякше-влак ончылно почеламутшо-влакым лудаш тӱҥалеш, республикысе Марий тӱвыра рӱдерын “У муро” студийже пеленсе (вуйлатышыже Г.Григорьев) “Кас сем” группа (художественный вуйлатышыже А.Тимофеев, самодеятельный артист-влак О.Якимова, А.Мамаев, П.Савельева, Г.Куклин, В.Чиванов) мурпӧлек аршаш дене куандара.

Пайрем мучаште у книгам ужалымаш лиеш (акше 200 теҥге). Поэт автографым пуэда.

У книгаж дене Йошкар-Олаште палдарымашым Г.Ояр сентябрь тылзе тӱҥалтыште эртара.