Йоча пайремым Республикысе марий тӱвыра рӱдер Марий Элын тӱвыра, печать да калык-влакын пашашт шотышто министерствын, Туныктыш да шанче министерствын, Йошкар-Оласе администрацийын тӱвыра управленийже, «Мер каҥаш» да «Российысе марий-влакын федерал калыкле-тӱвыра автономийышт» мер ушем-влакын полшымышт дене пырля эртара. Тушко йочасадыш коштшо да школышто тунемше-влак (6-шо класс марте) ӱжалтыт.
Йоча-влакым марий йомакысе талешке-влак саламлаш тӱҥалыт, тӱрлӧ модышыш уша. Тыгак пайремын изи унаже-влакым «Шовын шӱвыроҥ» шоу вуча, концерт программат оҥай лийшаш. Тушто оласе да районласе йоча коллектив-влак мастарлыкыштым ончыктат.
«Изи мӧр пеледыш» йоча пайремыш ушнаш кумылан-влакым mari-centr@mail.ru электрон адресыш йодмашым колтышаш улыт але лекше йодышым 8(8362) 45-88-51 телефон дене рашемдаш лиеш.
