Тиде кечын тоштыеҥ-влак лӱмеш сортам чӱктат. А тиддеч 2-3 кече ончыч пурам шолтеныт, кушкыжмын мончаш олтеныт, тоштыеҥым мончаш пураш, унала ӱжыныт. Вӱргечын эрдене эрак коҥгаш олтеныт, мелнам кӱэштыныт, сортам чӱктен пелештеныт.

Ожно самырык-влак, ош вургемым чиен, олыкыш каен, муро-влакым муреныт. Марий-влакын, руш калыкын семынак, Семык пайремлан пӧлеклалтше мурыжо уло. Олыкмарий-влак коклаште тыгай муро шарлен. Тудым профессор, филологий шанче кандидат, фольклорист да литературовед И.С.Иванов шке возымаштыже палемден:

«Тачат гына мыланна Семык пайрем,

Эрлат мыланна Семык пайрем.

Вес тыгане Семык пайрем шумешкыже

Мемнан гына вуйнаже Юмо деч.

Элнет гына мланде — лоп мланде,

Алашемын йолжымат нумалеш».

Руш калык Семыкым (Семик маныт) 24 майыште палемда да идалыклан ик гана, лач тиде кечын веле, шкем шке пытарыше але вес амал дене колышым, кӧм черке огеш отпеватле, панихидым заказатлен кертеш.

Тиде пайрем дене кылдалтше пале-влак улыт:

 — Тиде кечын ӱдымо шож чапле лектышым пуа.

 — Семык кечын шемым ошемдаш, йӱштылаш огеш лий. Вӱдыш пурен каен колышо ынже лий манын, вӱд воктеч кораҥ кошташ темленыт.

 — Семык кечын ургаш, кугу пашам тӱналаш темлен огытыл, шкетын чодыраш каяш чареныт.