«Угинде» еш пайремым ятыр марий ешыште кызытат эртарат. Республикысе марий тӱвыра рӱдер тиде йӱлам марий-влак илыман кундемлаште арален да щарен шогымо шотышто кугу сомылым виктарен шога. Тений этнофестиваль 14 октябрьыште регион-влак кӱкшытыштӧ эртаралтеш.

Чарла Кремльыште пайремлан тӱҥалтышым пакча-саскам, шыл-шӧрым, мӱйым да моло йӧрварым ужалыме ярминга ышта. Тушко ялозанлык предприятий, фермер да шке озанлык сатуштым луктыт.

Тӱҥ сценыште пайрем у пучымышым шолтымо йӱла дене почылтеш. Онаеҥ-влакын Юмылан киндым, моло саскам сайын шочыктымылан тауштымо шомакым пелештат, Юмо деч толшо калыклан тазалыкым, перкелыкым йодыт.

«Угинде» пайремлан киндым пыштыме. Могай рецепт почеш тудым ямдылыме? Очыни, кажне ешын шке секретше лийын, молан манаш гын, киндын кузе оварымыж гычат ешын идалыкым илен лекмыже рашемдалтын. Лач тиде секретым марий кинде конкурс почшаш. Тушко предприятият, посна еҥ-влакат ушнаш кумылыштым почыныт.

Подкогыльым кӧ эн сайын тӱрла – тидым марий кочкышым ыштыме конкурс терга. Посна ойырымо верыште спортым пагалыше-влакым тӱрлӧ модмашке, таҥасымашышке вучат.

Марий калыкын йӱла пайремжым  Марий Элысе шым район да Йошкар-Ола гыч 10 да Виче кундем гыч ик фольклор коллектив сӧрастараш полшат.

Кокымшо ий «Угинде» этнофестиваль вашеш Республикысе марий тӱвыра рӱдер «Шыжын поянлыкше» фотоконкурсым эртара. Таче кече марте (8 октябрь) 16 еҥ деч паша пурен. Нунын коклаште тунемше, тӱрлӧсферыште тыршыше-влак улыт. Сеҥыше-влак Чап танык, пӧлек дене палемдалтыт. Кажне участниклан сертификатым кучыктат.

Республикысе марий тӱвыра рӱдер, Чарла Кремль да «Российысе марий-влак» Федерал калыкле-тӱвыра автономий Марий Эл Республикын Тӱвыра, печать да калык-влакын пашашт шотышто министерствыжын да Ял озанлык да кочкыш шотышто министерствыжын полшымышт дене «Угинде» регион-влак этнофестивальым эртарат.

Пагалыме йолташ-влак! 14 октябрьыште Чарла Кремльыш пагален ӱжына. Пайрем 10 шагатлан тӱҥалеш.