Республикысе Марий тӱвыра рӱдерым Марий Эл Правительствын пунчалже дене 1999 ий ноябрь тылзыште ыштыме.
Рӱдер марий илыш-йӱла дене кылдалтше тӱрлӧ календарный пайремым организоватла да эртара. Нунын коклаште поснак Шорыкйолым, Ӱярням, Кугечым, Семыкым, Агавайремым, регион-влак коклаште да республикыште Пеледыш пайремым, Марий талешке кечым, Марий тиште кечым, национальный мурым шараш полшышо регион-влак кокласе фестивальым да молымат палемдаш лиеш.
Марий тӱвыра рӱдер тӱрлӧ лӱмлӧ кечылан пӧлеклалтше пайремым, муро концертлам эртара.
Тӱвыра рӱдер марий-влакын тӱшкан илыме кундемлаште – Удмурт, Татарстан, Башкортостан Республикылаште, Свердловск, Киров, Ленинград областьлаште, Ленинград, Москва олалаште, Ханты-Мансийск автономный округышто, моло вереат илыш-йӱлана дене кылдалтше пайремым эртарымашке кажне ийын ушна.
Рӱдер мастарлык классым, усталык лабораторийым, семинар-практикумым, конкурслам эртара, федеральный да региональный проектлам ямдыла да илышыш пурта, сценарий-влакым савыкта, электрон сборниклам, методический полышлам ямдыла.
Марий тӱвыра рӱдер пелен студент-влакын «Рвезылык» клубышт, усталык коллектив-влак: калык театр, «У муро» вокальный группа, «Чон оҥгыр» фольклор ансамбль, «Марий сылнымут тӱняште» йоча сылнымут кружок пашам ыштат.
Рӱдерын кугу пашажлан тыгак марий-влаклан «Марий кас», «Рвезылык» каныш каслам эртарымаш шотлалтеш.
