Салехардыште марий-влакынат национально-культур автономийышт чолган пашам ышта. Тудым Морко районышто шочшо, пытартыш 23 ийым Салехардыште илыше Л.Л. Григорьев вуйлата. Тудо тыгак «Мари кундем» лӱман ансамбльым поген да тудын «сапкандыражым» куча. Лач Леонид Леонидовичын ӱжмыжлан да тыршымыжлан кӧра мыланна финн-угор калык-влакын тиде чон почын вашлиймашкышт миен толаш пиал логале.
Марий Эл Республик гыч Салехардыш изирак культур десант кошто. Тушто РМЭ культурын сулло пашаеҥже, РМЭ-н И.С.Ключников-Палантай лӱмеш Кугыжаныш премийжын, «Калыкын чонжо» премийын лауреатше Ю. Осиповын вуйлатыме «Морко кундем» калык ансамбль, музыкант да мурызо, РМЭ-н Самырык-влаклан О.Ипай лӱмеш кугыжаныш премийжын лауреатше С. Яндукова, Республикысе марий тӱвыра рӱдерын пашаеҥже, поэт Г. Сабанцев-Ояр ыльыч. Нуно тиде мероприятийын чыла аланыштыжат марий калыкын поян культурыжын изирак ужашыжым кумыл нӧлтын ончыктеныт.
23 ноябрьыште 14 шагатат 15 минутлан Ямалысе шуко профилян колледжын актовый залыштыже студент-влак ончылно ятыр муро да почеламут-влак йоҥгеныт. Нуным С. Яндукова ден Г. Сабанцев пӧлекленыт. Вашлиймашым Л. Григорьев вӱден. 17 шагатыште шке мотор концертшым «Морко кундем» ансамбль тӱҥале. Тудын сценарийыштыже С. Яндукова ден Г. Сабанцевланат вер ыле.
24 ноябрьыште кастене Национальный культур-влакын округысо рӱдерыштын сценыштыже шке моштымашыжым Л. Григорьевын вуйлатыме «Мари кундем» ансамбль ончыктыш. Тудын деч вара сцене адакат Марий Эл гыч толшо уна-влаклан пуалте.
25 ноябрьыште рӱдерын дискотек залыштыже финн-угор калык-влакын чон почын вашлиймашышт лие. Финн-угор тӱнян икмыняр калыкшын: коми, хант, манси, селькуп да моло калык-влакын ансамбльышт ден солистышт выступатлышт. Марий-влак дек тыште Ямалысе Лабытнанги посёлко гыч Е.Веденькинын вуйлатыме «Шӱмсем» ансамбль ушныш.
Финн-угор-влакын тыгай вашлиймашышт эркын йӱлашке пура, тушто марий-влак шкеныштым эртак чулым велым почыт, нунын койышыштым ончышо ден уна-влак куанен вашлийыт. А тений Марий Эл гыч Салехард олашке миен коштшо-влак поснак кугу таум чолга марий Л. Григорьевын ешыжлан каласа.
Г.Сабанцев.
