Республикысе марий тӱвыра рӱдерын пашаеҥже-влак Геннадий Сабанцев ден Надежда Тимофеева туныктышо-влаклан рӱдерын инноваций проектышт дене палдареныт. «Марла ойлаш тунемына» мультурокым, «Марий йылме» видеоурокым ыштыме проект-влак кокымшо ий илышыш шыҥдаралтыт. Тений тыгак марий йылмым тунемаш тӱҥалше-влаклан электрон урок войзалтеш. Нине проект-влак Марий Эл Республикын тӱвыра, печать да калык-влакын пашашт шотышто министерствыжын полшымо дене ышталтыт. Туныктышо-влак рӱдерын пашажым кӱкшын акленыт.

Погынымашыште ик ой дене «Шочмо йылмым, тыгак руш йылмым, туныктышо-влакын ассоциацийыштын» марий пӧлкажым ыштыме нерген пунчалым луктыныт. Пӧлкан вуйлатышыжлан филологий науко кандидат, Марий туныктыш институтын кафедрыжым вуйлатыше Е. Игнатьева сайлалтын. Пӧлкан Каҥашышкыже Л. Матросова, Л. Иксанова да Л. Ильина пуреныт. Шочмо йылмым туныктышо-влакын ассоциацийыштын кундемысе пӧлкаже кызыт школлаште шочмо йылме-влакым туныктымо шотышто лекше неле йодыш-влакым решатлен шогаш тӱҥалеш манын, ӱшанымаш уло.