«Российысе марий-влак» Федерал калыкле-тӱвыра автономийын эртарыме «21 курым тӱҥалтыште ешын поянлыкше да тукымвож серлагышыже» этноэкспедиций дене Виче кундемыште лийме годым Яран районысо Никулята селасе тӱвыра пӧрт пеленсе краеведческий тоштерыште ик экспонат моткоч ӧрыктарен. Тиде – маска умша. Тӱвыра пӧртын пашаеҥже Маргарита Николаевна Вохминцева тудын нерген тыге каласкалыш:

 – Мый шкеже Никулята села воктенысе Ижемучаш (рушлаже – Верхоижье) ял гыч улам. Ожныракше Шорыкйол пайрем годым модмо-мужедме амал дене маскаумшам кучылтыныт. Тудо маска вуй гаяк кугу лийын. Тоштерлан йодмем почеш мемнан ял марий изиракым ыштен пуыш. Руш-влак пулвуйыш шинчыныт, а мемнан дене вуйым маскаумшаш пыштат ыле. Тыгай модмаш мемнан велне гына лийын.

Маска вуйым оҥа гыч ыштыме, вуешыже коваштым пижыктыме, пӱйжым пуда алмаштен. Маскан умшаже почылтшо-петырналтше манын, пу гыч каркасым ыштыме. Пружиным келыштарыме. Шорыкйол пайрем годым еҥ-влак маска умшаш вуйыштым пыштеныт. Тыгодым кид копам тупыш савыралыныт, сандене пӱгырнаш логалын. Тупыш тулупым пыштеныт. Тиде действийым моткоч кӱчык да ик жапыште шуктыман улмаш. Маска умша гыч пеш вашке вуйым луктын шукташ кӱлын.

Чаманаш логалеш, тиде йӱла модыш кызытсе курымышто самырык-влак коклаште мондалтын. Шорыкйол пайрем годсо мужедме-модмо настам арален кодымыжлан Маргарита Николаевналан таум каласена. Тудын гай чулым еҥ-влаклан кӧра мондалт толшо йӱлам илышыш угыч пуртена.