Коҥга ешыште, суртышто шнуй аралтышлан шотлалтын. Ожно коҥгаште тул идалык мучко йӱлен шинчен. А тиде тулжылан шолгымым еҥ-влак шке мӧҥгышкышт кумалтыш гыч конденыт. Тыгодым иктат шке коҥгаж гыч тулым але йӱлышӧ шӱйым пошкудыжлан, йодшо вес еҥлан пуэн огыл. Тыге сурт, еш, вольык, кинде пиал йомеш манын шоненыт.

Василийын кечыже. Межым огыт шӱдырӧ. Янлык-влак сӱаным эртарат. Тиде кечын сонар гыч кондымо йокма гыч кочкышым шолтеныт.

Пушеҥге укшлаште пӧрш налеш, коля лум ӱмбаке лектеш – шокшо толеш.

13 пургыж – Мигытан кечыже. Тул деч арала.

Корак ден чаҥа чот кычкырат, поран лийшашым шижтарат. Кечывалым пӧрш налеш, йӱдым лум огеш лий.

14 пургыж – Трифонын кечыже. Католик-влакын Шнуй Валентин кечым ушештара. Сӱан тылзе. Ӱдыр-влак качым йодын кумалыт. Кече луман лиеш – йӱран шошо толеш.

15 пургыж – теле рӱдылан мучаш. Вӱташте шогышо вольык пер кургыжым пытарен.

Тиде кечын шолышташ ок йӧрӧ, шолыштшо ӱмыр мучко чумырымо погыжым йомдарен кертеш. Шӧрым ужалаш огеш йӧрӧ. Тер корно лӱдыкшӧ.

Теле ден шошын вашлийме кечышт годым игечым эскереныт: кастене, шичмыж годым, кече онча – йӱштӧ тетла огеш лий, кече огеш ончо гын, пургыж тылзе мучаште йӱштӧ лийшаш. Шӱдыран кава – лум почеш кодын шула.