Тӱҥ мероприятий В.И.Ленин площадьыште почылтын. Марий Эл Республик вуйлатыше Александр Евстифеев шочмо элнан тӱҥ кугыжаныш пайремыш толшо-влакым Российын кечыже дене саламлен, 14 ийым темыше вич ӱдыр-рвезылан паспортым кучыктен. Тыгак «Йошкар-Ола» муниципал образованийым вуйлатыше Александр Принцев, марий рӱдолан мэрже Евгений Маслов саламлымаш шомакым каласеныт.
«Российысе марий-влак» федерал калыкле-тӱвыра автономийын йыжъеҥже-влакат шочмо элнан тӱҥ кугыжаныш пайрем колоннышто эртеныт. АвтономийСоветым вуйлатыше Лариса Яковлева официал еҥ-влак дене пырля Воин Чап монумент ончылно пеледыш аршашым пыштен.
А пайрем Йошкар-Олаште кас марте шуйнен, парк ден бульварыште, тӱвыра тӧнеж-влак ончылно да заллаштышт концерт программе, спорт таҥасымаш эртеныт, уремысе киноат ятыр кумыланым ушен. Чылаже ола мучко 11 площадкыште 20 утла тӱрлӧ сынан меропритяий-влак эртеныт.
