У ий йомак пайремыш 200 тунемше ӱжмашым налын. Нуно муниципал, республик да регион кокласе олимпиадылаште, усталык конкурслаште  сеҥышыш лектыныт, тӱрлӧ кӱкшытан мероприятийлаште чолгалыкым ончыктеныт.

Республикысе марий тӱвыра рӱдер марий пайремын изи унаже-влаклан «У ий чодырасе йомак-влак» спектакль сынан мероприятийым ямдыла.

У ий пайремыш кажне йоча йомак тӱнясе герой-влакын костюман толаш йӧрата. Марий елкышкат тыгак толшым вучена, вургем марий кумылым почшо лиеш гын, эшеат сай. Тидыже кажне йочалан «У ий марий чием» конкурсыш ушнаш да сеҥыше радамыш логалаш йӧным пуа.

«У ий открытке» конкурс ынде ий еда эртаралтеш. Йоча-влакын У ий пайремын сылнылыкшым кагазеш моткоч сӧралын почын моштат. Волжский, Курыкмарий, Советский, Шернур, Медведево, Килемар, Куженер районла, Йошкар-Ола да Козьмодемьянск олала гыч 21 паша пурен.

Республикысе курчак театрын артистше-влак йоча-влаклан чапле пӧлекым ямдыленыт. Нуно калык фольклор да йомак негызеш А.Н. Афанасьевын да В.И. Дальын «Лӱмудыр» спектакльын премьерыжым ончыктат. Тудым театрын самырык режиссержо Евгений Насупа шынден, сӱретче – Алексей Митрофанов.