Республикысе марий тӱвыра рӱдерын пашаеҥже-влак тидлан шке йӧныштым темлат. Онлайн манме режим дене «Марий касым», «Бард касым», мураш тунемме занятий-влакым, марий кочкышым ышташ тунемме мастар-классым эртара. Тушко кажныдам пагален вучена да пырля каналташ, гармонь почеш кап-кылым лывырташ ӱжына. Онлайн-мероприятийыште улмыдам лайкым ыштымыда шижтара.

Марий йылмым тунемашат йӧным ыштена: 2017 ий гыч таче кече марте Марий Эл Республикын тӱвыра, печать да калык-влакын шотышто министерствыжын полшымыж дене «Марла ойлаш тунемына» 22 мультурокым лукмо. Кажне урокшо могай-гынат темылан пӧлеклалтын. Тудым чукайда-влак дене пырля ончен, лончылен кертыда. Шинча ужын, йоча тунемеш, маныт. Айда пырля тунемына, вет икшывылан ача-ава дене пырля пашам ыштымаш пайрем дене иктак огыл мо!