Пайрем, пандемий шарлыме лӱдыкшӧ улмо амаллан кӧра, очный да заочный форматыште эртаралтеш.

Онлайн йӧн дене «Кудо», «Шокталте гармонетым», «Эх, марий вате», «Мастар кид» конкурс-влак лийыт. Кажне таҥасыш район да регионла гыч тушко ушнаш кумылан-влак деч йодмаш-влак пуреныт да кажне кечын пуренак шогат. Йодмашым идым тылзын 22 кечыже марте колташ лиеш. А 23-шо идым гыч конкурсант-влакын колтымо видеоштым  Марий тӱвыра рӱдерын вконтаке тӱшкаштыже (https://vk.com/marityvraryder) да сайтыштыже (http://mari-centr.ru/) вераҥдена.

Шыжа тылзын 1-ше кечынже Йошкар-Олаште, Чарла Кремльыште, Всероссийский фольклор пайрем эртаралтеш. Эр гычак калык мастар-влак паша ончерышт почылтеш.

11 шагатлан марий фольклор пайрем торжественно почылтеш. Тудын деч вара «Эх, кушталтена мо вара…» йыр куштымаш лиеш.

«Калык чон» пайрем концерт Марий Элысе да регионласе фольклор коллектив-влак выступленийышт дене куандарат.

15 шагатлан «Марий Эл» кугыжаныш куштышо ансамбль тӱрлӧ кундемлаште илыше марий калыкын куштымашыштым ончыкта. Пайрем сценым варажым нуным марий эстрадын шӱдыржӧ-влак «Пайрем дене, Марий Эл!» концерт программышт дене алмаштат.

Марий автономийым ыштымылан 100 ий да Пеледыш пайремым эртараш тӱҥалмылан ик курым теммылан пӧлеклалтше Всероссийский фольклор пайрем Марий кас дене мучашлалтеш.