Марий йылме дене эртыше мероприятийыш марий йылмым, калык-влакын историйыштым да тӱвыраштым тунеммаште сай кӱкшытыш шушо, усталык вашӱчашлаште, фестивальлаште сеҥыше-влакым толыныт. Шернур район Марисола кыдалаш, Куженер район Коҥганур, Советский район Ӱшнӱр да Кукмарий, Волжский район Пӧтъял, Медведево район Руш Кукмор, Йошкар-Оласе 2-шо номеран кыдалаш школ-влакын тунемшышт-влаклан сылне пайремым ямдылыме.
Йоча-влакым саламлыше-влак: Марий Эл Республикын тӱвыра, печать да калык-влакын пашашт шотышто министрын алмаштышыже Галина Ширяева, Россий Президент пеленысе калык-влакын пашашт шотышто Советшын йыжъеҥже, Российысе марий-влакын калыкле-тӱвыра автономийым вуйлатыше Лариса Яковлева, Республикысе марий тӱвыра рӱдерын вуйлатышыже Наталья Пушкина – пайремын участникше-влаклан кеҥеж пагытым веселан да пайдалын эртараш тыланеныт.
Эн ончыч фойеште оҥай программе эртен. Пайремын изи унаже-влакым мультфильмысе Смурфик, Смурфетта, Гаргамель дене пырля марий йомакысе герой Агытан, Пеледыш, Тарля кова сай ден осалым ойыраш, икте-весе дене нелылыкшымат, порыжымат лош пайлаш тунемыныт.
«Юзо шӱвыроҥ» шовын шоушто эсогыл шӱвыроҥ йымалне шогаш лиеш.
Концерт программымат уста, марий тӱвыралан шӱман йоча-влак лӱмлӧ марий мурызо-влак дене пырля чоҥеныт. Российын сулло артистше Зоя Берникова «Падыраш» да «Онар» йоча коллектив-влакын участникше Максим Киндулкин дене «Ой, луй модеш» такмак дене куандареныт. Марий Эл Республикын калык артистше Светлана Осипова Серафима ден Мария ӱдыржӧ-влак, мурызо Володя Матвеев «Юкече» вокал студийын мурызыжо Данила Коротков, Роза Искакова «Мый артист» вокал студийын участницыже Элвия Николаева дене муреныт.
Пайремын изи унаже-влакым марий куштымашын йӱлажын Шернур кундем гыч изак-шоляк-влак Илья, Алеша да Никита Шабдаровмыт, «Шокто, гармонь», «Онар» йоча коллектив-влак куштымашышт гоч почын пуэныт.
Фойеште «Мый улам Марий Элын йочаже» («Дети Марий Эл») фотоончер рӱдерын йоча мероприятийым эртарыме татым почын ончыктен.
«Юзо шӱвыроҥ» шовын шоушто йоча-влаклан шовынан вӱд гыч тӱрлӧ образыш пураш йӧным ыштеныт, шӱвыроҥ купол йымалне кажныже шогалын.
Пайремыш толшо кажне йочам «МариАйс» компаний лумэгерче дене сийлыме, а «Саскавий» марий ӱдырамаш ушем марий календарьым пӧлеклен.
