Пайремыш толшо-влакым Марий Эл Республикысе тӱвыра, печать да калык-влакын пашашт шотышто министрын икымше алмаштышыже Владимир Актанаев, Марий Эл Республикысе ялозанлык да кочкыш шотышто министрын алмаштышыже Антон Хлопов саламленыт.

Пайрем радам театрально-музыкальный постановко семын эртен. Тудым режиссёр Владимир Климов ямдылен. Тыге М.Шкетан лӱмеш марий кугыжаныш драме театрын артистше-влак киндым ӱдымым модын ончыктеныт. Марий карт Алексей Чемеков юмылан тауштен, угинде перкем йодын.

Пайрем годым марий, руш, татар, чуваш муро-влак йоҥгеныт. Тидым пеш мастарын Марий Элын калык артисткыже Зоя Берникова, Марий Элын сулло артисткыже-влак Светлана Строганова ден Ирина Ефремова, калык лӱмым нумалше «Чувашъен» фольклор ансамбль, Россий кӱкшытан конкурсын лауреатше Фарит Хайруллин, татар куштышо ансамбль «Булгар», А.Искандаров лӱмеш капелла пеленсе муро театр, Марий кугыжаныш университет пеленсе «Марий мурсем» фольклор ансамбль ыштеныт.

Пайрем программым Вера Соболева ден Аркадий Сергеев вӱденыт. Марий тӱвыра рӱдерын пайремжым Марий Эл Республикысе тӱвыра, печать да калык-влакын пашашт шотышто министерствыже, Марий Эл Республикысе ялозанлык да кочкыш шотышто министерстве, руш, татар, чуваш тӱвыра рӱдер-влак эртараш полшеныт.

Шуматке-рушарнянак фермер ден ялозанлык пашазе-влак тӱрлӧ ыштыш-кучышым, емыж-саскам, пакчагӧргӧ лектышым ужаленыт.